feeling thoughtful.12-08-2020
കണക്ക് .
___________
കണക്കിനും സയന്‍സിനും സ്കൂളില്‍
നല്ല മാര്‍ക്ക് വാങ്ങി ,ഫസ്റ്റ് ക്ളാസ്സില്‍
പാസ്സായി അന്ന് .
ചിലര്‍ക്ക് ഓര്‍മ്മയുണ്ടാവും സര്‍ട്ടിഫിക്കറ്റില്‍ PLACED IN FIRST CLASS
എന്നെഴുതിയ സര്‍ട്ടിഫിക്കറ്റ് ലഭിച്ചിരുന്നത്.
അവര്‍ക്ക് ഏത് കോളേജിലും ഏത് ഗ്രൂപ്പും ലഭിക്കുമായിരുന്നു.
ഒരു ഡോക്ടറോ എഞ്ചിനീയറോ ആകാന്‍ വേണ്ട മിനിമം മാര്‍ക്കിന്റെ
എത്രയോ മടങ്ങ് മാര്‍ക്ക് വാങ്ങിയ ഞാന്‍ ,കണക്ക് ,സയന്‍സ് ,
ഇതൊന്നും എടുക്കാതെ അന്ന് (അതേ അന്ന്) ,
കോമേര്‍സ് ഗ്രൂപ് എടുത്തു പഠിക്കേണ്ട ഗതി കേടിലായിരുന്നു.
പറഞ്ഞു വന്നത് ,
എനിക്കു സയന്‍സൊ കണക്കോ പഠിക്കാന്‍ സാധിക്കാതെ ,
കോമേര്‍സു പഠിക്കാന്‍ വിധി വന്നതു ഒരു കണക്കാണു.
കണക്കു് അത്രയ്ക്കും കണിശമായതുകൊണ്ടു് പ്രപഞ്ചം ഇങ്ങനെയേ ഉണ്ടായി വരാൻ പറ്റൂ. അതുകൊണ്ടാണു് ഫിസിക്സ് എന്ന ശാസ്ത്രശാഖയുണ്ടായതു്. ആ ഫിസിക്സിന്റെ അടിസ്ഥാനനിയമങ്ങൾ നിർബന്ധിച്ചതുകൊണ്ടു് മൂലകങ്ങളും സംയുക്തങ്ങളും നാം ചുറ്റിലുംകാണുന്ന എല്ലാ രാസരസങ്ങളും ഉണ്ടായി വന്നു.
ഇത് ഞാനല്ലാ പറഞ്ഞത് .വളരെ സത്യമായ സത്യം മുഖ പുസ്തകത്തില്‍
എന്റെ ഒരു അഭിവന്ദ്യ സുഹൃത്തിന്റെ പോസ്റ്റിലെഴുതപ്പെട്ട മഹാ സത്യമാണ്.
അതാണ് കണക്ക് .
ഞാനിവിടെ പറയുന്നതും കണക്ക് തന്നെ.
പക്ഷേ എന്റെ കണക്കിനെ നിങ്ങള്‍ എങ്ങനെ വിലയിരുത്തുന്നു എന്നതില്‍
നിക്ഷിപ്തമാണ്.
എങ്ങനെ വിലയിരുത്തിയാലും കണക്ക് തന്നെ.
അത്രയ്ക്കും കണിശമായ കണക്കിനെ ,മലയാളത്തില്‍ പ്രയോഗിക്കുന്ന
കണക്ക് മറ്റൊരു ഭാഷയിലും ഉപയോഗിക്കുമോ എന്ന് എനിക്കു സംശയമുണ്ട്.
നിങ്ങള്ക്ക് സംശയമുണ്ടോ .?
എങ്കില്‍ അതൊരു കണക്കിനു ശരിയാകാം.
നിങ്ങള്‍ക്കതില്‍ സംശയമില്ലെ .?
എങ്കില്‍ നിങ്ങള്‍ കണക്ക് തെറ്റിച്ചല്ലോ സുഹൃത്തെ.
ഇതിലൊന്നും കണക്ക് പറഞ്ഞിട്ടൊരു കാര്യവുമില്ല.
കണക്കിനു കിട്ടിയെന്നും,
കണക്കായി പോയി എന്നും ,
നിങ്ങള്ക്ക് പറയാം.
ഒരു കണക്കിനവന്‍ രക്ഷപ്പെട്ടു,
എന്നു പറയുന്നതിലും ഒരു കണക്കുണ്ട് .
ജീവിതം ഒരു മന കണക്കല്ല എന്നതിലും കണക്കുണ്ട് .
എല്ലാം കണക്ക് എന്ന ആക്ഷേപത്തിലും കണക്ക് ഒളിച്ചിരിപ്പുണ്ട് .
എല്ലാ കണക്കും തെറ്റിച്ചു കൊണ്ടായിരുന്നു ഈ വര്‍ഷത്തെ മഴ
എന്നു പറയുന്നതിലെ കണക്ക്, കണക്കറിയാത്തവര്‍ക്കും മനസ്സിലാകും .
കണക്ക് ബോധിപ്പിച്ചു എന്നും, കണക്ക് തീര്‍ത്തു എന്നതും ,ഒരു കണക്കിനു ശരിയല്ല എന്നതും ഒക്കെ കണക്ക് കൊണ്ടുള്ള കളികള്‍ തന്നെ.
ചില ജീവിതങ്ങളൊക്കെ ഒരു കണക്കാണു .
പരസ്പര ചേര്‍ച്ചയില്ലാത്ത ബന്ധങ്ങളെല്ലാം തന്നെ ഒരു കണക്ക് തന്നെ.
കണക്ക് തെറ്റാതെയുള്ള ജീവിതം തന്നെ വലിയ ഒരു കണക്കാണു .
ആര്‍ക്ക് തെറ്റിയാലും പ്രക്രൂതിയ്ക്ക് കണക്കുകള്‍ തെറ്റാറില്ല.
ഈ കൊറോണ പോലും ഒരു കണക്കിനു തെറ്റിയ കണക്കല്ലേ .
പറയൂ നിങ്ങള്ക്ക് കണക്കുകള്‍ അറിയാമോ .
എന്തായാലും പറയൂ .
കണക്ക് തെറ്റിയാലും, ശരിയായാലും കുഴപ്പമില്ല.
രണ്ടും കണക്ക് തന്നെ.
__________________________________
ചിത്രം -ഗൂഗിളിനോട് കടപ്പാട് .
No comments:
Post a Comment